Trainingslager – Tag 6
Standartgmäss hätmer sich am Morge früeh idä Hotellobby troffä
Wie am Tag devor simer wetterbedingt nöd am Strand nache gloffä
Während di einte oder andere gähnet und sich idä Auge riibät
Beufträget eus Trainer, dass alli d`Postchartene unterschribät
Mit so vil Unterschrifte hetmer sich gfühlt wie Fuessballprofis
Doch wemer d`Schribfehler beachtet, meintmer mir säget Globis
Ih dä hüttigä Trainings merktmer adä Qualität die schwäre Bei
Dank em Regeschauer am Morge isch de Bode nöd ganz wie en Stei
De Fokus vom Morgätraining isch ufem Spielä vo lange Bäll glägä
Wie das richtig gaht hend eus Coaches im heftige Räge müsse sägä
Am Schluss hend wider zwei Mannschaftä gegenand gmätschlet
Während de Dani uf sine Minze-Zahstocher vom Kamer hät umechätschet
Mit Hamburger gits am Zmittagsbuffet überraschend nöd immer sgliich
so gstaltet sich eusi Ernährig über di ganz Wuchä als sehr kalorieriich
Alli Spieler vode Mannschaft hend bide Servierdüsä es Coci wele bstellä
De tosendi Applaus drufabe isch gsi, will si d`Gläser hetti besser hebe sellä
Di meischte Spieler ziehnd sich zrugg vorem Training und suechet ihri Rueh
Ussert eusi Mary, die hät mit massiere wie immer alli Händ voll z`tue
Au im letschtä Training hätmer gmerkt, ahfangs Wuchä ischmer fitter
Darum sind au bim Serieschüsse meh Bäll übers Absperrigsgitter
D`Bäll hetmer darum müsse go sueche im Riich vo Schnägge und Schlange
Nöd alli Spieler hend sich getraut is höche Gras und Gebüsch ine z`lange
Abschlüssend gahts miteme spannende Penaltyschüsskrimi wiiter
Dassmer mit nur eim verschossene Penalty verlürt, isch zimli bitter
De hütig Abig wird wahrschindlich de Grossteil idä Hotellobby verbringä
Hoffemer dass am Nöggi nöd wieder all Schällestich bim Jasse möget glingä
Und sust spielermer so lang bismeren gmeinsam endlich möget bezwingä
Es dörf au bizli länger goh, da mir dä morgig Tag trainingsfrei chönd verbringä
Mer freuet eus uf en gmüetliche letschte Abig do im schöne Ayia Napa
Bevors morn wieder hei gaht zu Fründinne, Gschwüsterti, Mama und Papa
De Tagesbricht isch gschribe worde vom Marc Fritschi alias MC Capitano
Hilf heter übercho vode Zimmergnosse MC Remo St. und MC Silvano
Live Bild von der UNO und Jassrunde aus Ayia Napa:
